Mai 23 2008
Dechreuodd pethau gyda gwasanaeth awyr agored yn adfeilion Abaty Glyn y Groes, ger Llangollen, a gorffen gyda noson o gerddoriaeth gwerin, pop ac electronig mewn clwb yng Nghaerdydd.
Diolch yn fawr i’n holl gefnogwyr yng Nghymru a ddaeth i’r digwyddiadau hyn a rai eraill yn ystod Wythnos Cymorth Cristnogol (Mai 11-17).
Daeth mwy na 200 o bobl i Abaty Glyn y Groes ar y Sul cyntaf. Yn cymryd rhan roedd côr gospel a dau o’r grwp sy’n addysgu eu cyfoedion ar HIV ac a fu yn Sierra Leone gyda Cymorth Cristnogol yn Chwefror - Catherine Peake a Shauna Roberts.
“Roedd yn brofiad anhygoel i annerch dros 200 o bobl mewn lleoliad mor ffantastig,” meddai Catherine. ”Roeddem wrth ein bodd yn rhannu storïau partneriaid Cymorth Cristnogol yn Sierra Leone gyda hwy.”
“Ar ôl y gwasanaeth fe wnaethom ni gyfarfod a llwyth o gefnogwyr a chael picnic yn yr heulwen. Dechrau gwych i Wythnos Cymorth Cristnogol 2008!”
Pob math o ddigwyddiadau
Cafwyd cymysgedd diddorol o ddigwyddiadau yn ystod yr wythnos – o’r arwerthiant planhigion blynyddol yng Nghaerdydd i nifer o nosweithiau Quizaid ar draws y wlad.
Daeth y cyfan i ben ar nos Sadwrn Mai 17 yng Nghlwb Ifor Bach, Caerdydd. Er y siom bod Clwb Pêl droed Caerdydd wedi methu ennill Cwpan yr FA, daeth nifer o fans cerddoriaeth i wrando ar rai o artistiaid mwyaf poblogaidd y sin pop Cymraeg.
Roedd y noson yn cynnig cymysgedd o gerddoriaeth gwerin, pop ac electronig. Y band un dyn, Messner, dechreuodd y noson, gyda Clinigol, y band pop electronig yn dilyn.
Roedd y bardd a’r gantores, Gwyneth Glyn, yn hapus i gefnogi Cymorth Cristnogol unwaith eto, ar ôl perfformio yn Rali Torrwn y Carbon yng Nghaerdydd yn 2007. Un o’r caneuon a ganwyd ganddi oedd ‘Gaea’n Gynnar’, a ysgrifennwyd yn arbennig ar gyfer y rali.
Brigyn, un o ffefrynnau'r sin gerddoriaeth yng Nghymru (yn y llun), ddaeth a’r noson, ac Wythnos Cymorth Cristnogol, i ben gyda chaneuon o’u halbwm newydd, ‘Brigyn 3’.